Bakı Türk Anadolu Liseyinin təşkilatçılığı ilə "Qarabağ Şəhidləri və Qarabağ Zəfəri" adlı şeir müsabiqəsi elan edilib.
Türk Əməkdaşlıq və Koordinasiya Agentliyi (TİKA), Azərbaycan Respublikası Təhsil Nazirliyi və Azərbaycan Yazıçılar Birliyinin əməkdaşlığı ilə təşkil olunan müsabiqədə Azərbaycandakı bütün məktəblərin 9, 10 və 11-ci sinif şagirdlərinin iştirak edəcəyi gözlənilir.
Yanvarın 20-də start götürən müsabiqəyə əsər qəbulu aprelin 15-də yekunlaşacaq. Nəticələrin mayın 15-da bilinəcəyi, mükafatlandırma mərasiminin isə mayın 24-də keçiriləcəyi planlaşdırılıb. Müsabiqəyə əsər qəbulu onlayn və ya poçt vasitəsiylə həyata keçirilir.
Müsabiqədə yüksək nəticə əldə edən ilk 50 iştirakçının əsərləri kitab halında nəşr olunacaq.