Ey Allahın əziz dostu , rəfiqi,
Bütün aləmlərin rəhmət çırağı.
Ey insanlıq məqamında münəvvər
Bu əşrəf varlığın ziynət çırağı.
Salam olsun sənə !
Bütün aləmləri nurlandırır rəhmət çırağın
Verir insanlığa ya Mustəfa ziynət çırağın.

***
Ey insandan məqamı üstün insan,
Mələklər bu məqama, hala, heyran,
Ey ömrü büs-bütün mənayi-Quran,
Sözü ariflərə hikmət çırağı.
Salam olsun sənə !
Səbəb Qurandadır düz dörd yüz ildir ki günəş tək
Saçır öz nurunu elm əhlinə hikmət çırağın.
***
Mələklər səndən öyrəndi ibadət
Ürəklər səndən istərlər şəfaət
Böyuk bir fəxr ilə , ruzi-qiyamət
Ey  iman əhlinə, cənnət çırağı.
Salam olsun sənə !
Fənada və bəqada kimsə yoxkən Xaliqi-Yekta
Sənin nurunla ziynətləndirib cənnat çırağın.

***
Səni əks etdirir mənada hər şey,
Tapar hər kəs sənə sevdada hər şey,
Sənə xatirdi bu dünyada hər şey
Sən ey Xaliq üçün xilqət çırağı.
Salam olsun sənə !
Sənə xatirdi bu xilqət durub əşrəf məqamında,
Sənə xatir Xuda yandırdı bu xilqət çırağın.

***
Səni dərk eyləsəydi əhli-dünya,
Xudanı dərk edib tapmışdı məna,
Adında birləşib İsa və Musa
Cahanın sönməyən vəhdət çırağı
Salam olsun sənə !
Salar pərvanələr meylin həmişə gur yanan şəmə
Yığar dünyanı bir gün başına vəhdət çırağın.