Tablo

Pəncərədən baxırsan
Qarşında çay
Buğlanan çayın buğu
Açıq yaxandan axır aşağı

Düymələrin şişmiş ovurdlarmı -
Sözlü adamlara oxşayır onlar

Yığılıb saçların
Fəqət bir tel
Yalamağa hazırlaşır donunun ətəklərini


Rəqs eylə

Ey qadın
Ey yarpağı üstündə olan
Alma
Armud
Rəqs eylə

Əllərin
Təzə-tər şivdi
Rəqs eylə

Gövdən
Ağac gövdəsi
Rəqs eylə

Donunun qırışları –
Köklər
Rəqs eylə


Model

Ey qadın
Ey rəssam qarşısında oturan
Çılpaq model

Əllərinə de
Dizlərinin arxasınca getməsin

Onsuz da
Belə vaxtlarda
Unutqan olur dizlər

Ayaqlarına de
Soyunsun getdiyi məsafələri

Və onları hara gəldi atmasın


Metamorfoza

Ey kresloya oturan
Çılpaq qadın
Mən sənin əzalarının yerini dəyişirəm

Döşlərini ovcuna,
Gözlərini
Onların yerinə qoyuram

Dodaqlarını
O zərif ayaqlarınla dəyişirəm

Və ovucların
Ən qədim zamanla dolur

Daha gözəl görür sinən...
Ayaqların danışır...



Ey tufan

Qayıqda qadın
Adəmdi
Həvvadı
Nuhdu

Əllərində avar
Kişi müqəvvasıdı
Başını suya salıb çıxarır

Ey lal suları
Kişi başıyla yaran
Ey lal suları
Kişi diliylə danışdıran qadın

Ey tufan
Burnun
Gövdən
Sinən
Ağrımızda

Bizsə səndə batırıq
Ey qadın




Eheyy...

Ey kişiyə sarılan qadın
İki gözün
Pırr eyləyib uçdu üzündən
Görmədinmi

Əllərini öz əlinlə
Asdın kişi boynundan
Boğdun əllərini 
Sezmədinmi

Ayaqlarını dəfn etdin
Kişi ayaqlarının arasında
O boş
O mənasız ərazidə
Doymadınmı



Yazı

Ey
Başım üstə
Dövrə vuran qadın
Mən səni
Enməyə qoymuram

Guya mən
Yazı adamıyam
Guya
Belə yazılıb yazı

Misralarım
Enmə zolağının
Dümdüz xətləri

Guya sən bura ensən
Pozulacaq bu xətlər

Qırılacaq
Böyrümə qısıla-qısıla
Üzümə qımışan
İlham pərimin qanadları

Və sən
Bunları bilə-bilə
Daha çox fırlanırsan başıma
Ey qadın

Avanqard.net