Biz satıcıdan şərab adı ilə

qadın yoxluğu alıb içmiş adamlarıq,

İndi üzülmərik, kimlərinsə getdiyinə...

Biz “AA” nömrəli maşınlara minmədik

Avtobusları ayağımıza sürdürdük,

Sizin maşınızın at gücü bizim tək ayağımıza dəyməz.

Yaxşı ki, sizin Nuh gəminiz yoxdu,

Yoxsa özünüzünkülərdən başqa

heç kəsi də mindirməzdiniz

Cəhənnəm nişanıdı gözləriniz,

Sizinlə göz-gözə gəlib 

Axirətə inanmamaq namümkün.

Anam olmasaydı, dünyaya bulaşardım mən də

Yaxşı ki, var,

“getmə, qayıt” deyib çəkir özünə məni.

Baxmağa yerin yoxdursa,

Dünya-pəncərə zad deyil,

Utanın yalanınızdan

Məni çağırın geri,

Gedim bu ağbaş, qarabaş adamlardan çıxıb gedim,

Burda adam hər gün “beş-üç qram nüftə”dən yaradıldığını

Xatırlamaya bilmir.

Burda başqalarının murdarlığına baxıb özündən iyənirsən...

Avanqard.net