Fevral ayının 21 “Dünya Ana Dili Günün” yaxınlaşması ilə İran İslam Respublikasınn milli təhlükəsizlik qüvvələri gücləndirilmiş iş rejiminə keçirlər.

Güney Azərbaycanlı ziyalı, yazıçı, şair, jurnalist və milli fəallara divan tutulan günlərdən biri də, elə Dünya Ana Dili günüdür. Bu günü, bütün dünya millətləri sevinc, şadlıq və təntənəli şəkildə qeyd etdiyi bir halda Güney Azərbaycan milləti, ziyalı və yazarları bu sevinc və şənliyin dadını çıxarmağın necə də acı və acınacaqlı olduğuna bir daha da inanırlar.

Güney Azərbaycan siyasi-ictimai aktivistləri və ziyalıları, milli haqları və istəkləri uğrunda apardıqları dinc və sivil mübarizə üçün hər tərəfli şəkildə maarifləndirmə xarakterli yazılar və çıxışları ilə öz milli və tarixi borclarını yerinə yetirməkdədilər.

Güney Azərbaycanda “Dünya Ana Dili Gününün” rəsmi şəkildə qeyd olunmasının yasaq olduğuna görə milli fəaların evlər və başqa yerlədə keçirdikləri toplantı və yığıncaqlar, milli təhlükəsizlik qüvvələri (ETTELAAT) tərəfindən hücumlara məruz qalaraq, darmadağın edilir.
Fevral ayının 16-da Güney Azərbaycanın Xoy şəhərində həps olunmuş Əmin Hacılı, Araz Xassə və  İslam Əl Əkbərli haqda bu günə qədər, heç bir bilgi və informasiya əldə yoxdur. İran Milli Təhlükəsizlik qüvvələri tərəfindən həps olunmuş milli fəallarımızın ailə və yaxınlarının dediyinə görə, onların harada, necə və hansı ittihamla həps oulunduğu haqda hələ ki, heç bir məlumat verilməyibdir.

1992-ci ildə Güney Azərbaycanın Xoy şəhərində Azərbaycan sevər və milli düşüncəli bir ayilədə Anadan olan Əmin Hacılı, ilk və orta təhsilatını yerli məktəblərdə bitirdikdən sonra böyük qardaşı Şirzad Hacılı (dəfələrcə həps olunmuş  milli fəal) qılavuzluğu ilə Azərbaycan ədəbiyyatı, tarixi və dilinə könül vermişdir. Xoy şəhərinin gənc şair və yazarları içində aktivliyi, cəsarəti və dəyərli yazıları ilə tanınan şair, öz milli fəaliyyətini də günü gündən genişləndirmişdir. Əmin Hacılının apardığı ədəbi və siyasi-ictimai fəaliyyət, Xoy şəhərinin milli təhlükəsizlik qüvvələri idarəsini (ETTELAAT) hədsiz dərəcə də qəzəbləndirdiyi üçün, gənc yazarı dəfələrcə telefon zəngləri vasitəsi ilə hədələyib təzyiqlərə məruz qoymuşlar.

Əmin Hacılının şeir və yazıları bir çox dərgi, qəzet və internet düşərgələrində dərc olunub. Gənc yazarın Xoy şəhərinin ədəbi dərnəklərində apardığı ədəbi fəaliyyət və keçirdiyi törənlər, onun dilimiz və ədəbiyyatımıza olan vurğunluğu və sevgisindən xəbər verməkdədir.

Əmin Hacılı: Şeirlər

 Öldürdülər, bir-bir öldürdülər insanlar
Bulud, Oxtay, Səməd, İbrahim, Əmani
Qara bir bulud kimi sovuşub getdilər göylərin maviliyinə
Biz isə quş olduq dostum, quş
Quşların dili varmı dostum ?
Quşlar danışarmı ?
Şeir yazarmı ?
Qaşığımıza ayrılıq gəldi dostum
Həsrət gəldi
Dəyənək gəldi
Analarımız nə bişirdi isə yedik
Yarpızdan zəhləmiz getmədi
Qapımızda ilan göyərdi
Kimsə öz ölkəsində peyğəmbər olmadı dostum
Biz sevgililərimizə çələng toxumadıq dostum
Bir ovuc torpaq aldıq sadəcə
Ən böyük fantaziyamız, dustaq divarlarında adlarını qazdıq sevgililərimizin
Kökümüzü qazmaq
Qəbrimizi qazmaq
Biz böyük arzularla yaşadıq
Boğazımızda ilişib qaldı böyük sözlər
Ağzımızdan şübhələndilər
Psixoloqlara getdik
Assimilasiyanı tüpürdülər damarımıza
Insan çörəksiz yaşamaz dedilər
Susuz yaşamaz
Havasız yaşamaz
Insan dilsiz yaşarmı dostum?

Anam mənə bir sapand verdi
Qarğaları qovmaq üçün tarladan
Sapandla atdım toxumları qarğalara
Onlarda yerinə gümüşü düymı gətirdilər mənə.


Yazar: Təkin Ötükənli